कोपरगाव (प्रतिनिधी) : नागपूरहून मुंबईच्या दिशेने येत असताना शिर्डीलगत कोपरगाव परिसरात एका चारचाकी वाहनाला अचानक आग लागल्याची घटना आज घडली. सुदैवाने चालकाने प्रसंगावधान राखत वेळेत वाहन थांबवून बाहेर पडल्याने मोठी जीवितहानी टळली.
मिळालेल्या प्राथमिक माहितीनुसार, नागपूरहून मुंबईकडे जात असताना वाहनातून अचानक धूर निघू लागला. काही क्षणांतच आगीने वाहनाला वेढा घातला. परिस्थितीचे गांभीर्य ओळखून चालक आणि त्याच्यासोबत असलेली अन्य एक व्यक्ती तात्काळ वाहनाबाहेर पडली. त्यामुळे दोघांचेही प्राण वाचले.
घटनेची माहिती मिळताच स्थानिक नागरिक आणि संबंधित यंत्रणा घटनास्थळी दाखल झाली. मात्र तोपर्यंत आगीने वाहनाचा मोठा भाग जळून खाक झाला होता. आगीचे नेमके कारण अद्याप स्पष्ट झाले नसून तांत्रिक बिघाडामुळे आग लागल्याचा प्राथमिक अंदाज व्यक्त केला जात आहे.
या घटनेत कोणतीही जीवितहानी झाली नसली तरी वाहनाचे मोठ्या प्रमाणात नुकसान झाले आहे. घटनेचा अधिक तपास सुरू आहे.
